[kawgaminsesi]

Dema tu li dûrî min bî
Çawa binivîsîm navê te
Li ser dilê xwe bî pelên agir
Kû tu mîna ava çemên sar
Wî agirî venemirînî
Kû ji bo te nehelim, har û dîn nebim
Çawa bêjim ez evîndarê te me
Dema min ji tenêbûna min venegerînî


Ezê çawa bêjim ez bendewarê te me
Dema mîna stêrka esmanan
Birêjî bi ser welatên nedîyar de
Çend sedsal derbasbûn nizanim
Bi ser veqetîna me de
Guh kerrbûn li benda dengê te
Çav li asoyên dûr man her dem
Qerimîn, korbûn
Li benda hatina te


Ezê çawa bêjim ez birîndarê te me
Dema birînên min nekewînî
Nebihîzî nalîn û hawarên min
Li dû xwe hiştim di gel kanîya derdan
Tu dê çawa derman bikî
Derdên nexuyayî
Birînên bi salan di dil de veşartî


Ezê çawa bijîm bê te
Dema hebûn û nebûn bi hev re, ne di şer de bin
Şev û roj şûnguherîya hev nekin
Dema gul venebin di buharan de
Biqefilî di kela kela havînan de
Kew hêlînên xwe terk bikin ji qertelan re
Dema hezkirin li ber mirinê be
Çawa bijîm bê te